Нилуфар Ўринбоева,
Республика перинатал маркази директори:

— Кесарча кесиш – жарроҳлик аралашуви бўлиб, ҳар қандай ҳолатда ҳам табиий туғуруқдан фарқ қилади. Бундай операциядан кейин аёлнинг бачадонида чандиқ ҳосил бўлиши ва бу кейинги туғуруқларнинг табиий кечишига салбий таъсир этиши мумкин.

Шунингдек, ушбу амалиётдан сўнг онанинг реабилитация даври ҳам анча узоқ давом этади. Хусусан, аёлнинг бачадони қисқариши учун табиий туғуруққа нисбатан кўпроқ вақт талаб этилади.

Қорин олд деворида косметик чандиқ қолиши, чок излари, яллиғланиш, инфекция тушиш хавфи, стандарт жарроҳлик асорати бўлган қон кетиш, эмизиш билан боғлиқ муаммолар ҳам ушбу амалиётнинг салбий жиҳатларидир.

Умуман олганда табиий туғуруқ физиологик жараён эканлигини ҳар бир бўлғуси она тушуниши, муҳими, кесарча кесиш болани одатий йўл билан туға олмайдиган аёллар учун мўлжалланганини англаши зарур. Яъни, ушбу оператив усул фақат онанинг хоҳиши билангина амалга оширилмайди ва табиий туғуруқдан қўрқув кесарча кесишга асос эмас. Бунинг учун аниқ тиббий кўрсатмалар бўлиши лозим.

Соғлиқни сақлаш вазирлиги
Матбуот хизмати.